நிலவுவெளி

சென்னை காதல்

2006-12-09T12:46:00.000+04:00

ஒரு வார விடுமுறை நாள் மோசமாக முடிய என்னென்ன காரணங்கள் இருக்க முடியும்.

1. காலநிலை நன்றாக அமையாமல் போகலாம்.
2. பக்கத்து போர்ஷனில் தொலைக்காட்சி சத்தம் உங்கள் ஆழ்ந்த தூக்கத்தை கலைக்கலாம்.
3. ஒரு நல்ல சினிமா பார்க்கலாமே என்று முடிவெடுத்து சென்று மிக மோசமான திரைப்படத்தை பார்க்க நேரலாம்.

இந்த மூன்று விஷயங்களுமே மிக சரியாக வாய்த்தது எனக்கு. அதிலும் மிகவும் அதிக பாதிப்பை அளித்தது மூன்றாவது விஷயம்தான்.

"சென்னை காதல்" என்ற நல்ல star cast உள்ள , நல்ல தயாரிப்பாளர் தயாரித்த, வெகு நாட்களுக்கு பிறகு விக்ரமன் படம் என்றெல்லாம் எண்ணி விமர்சனம் அறியாமலேயே
போனதற்கு மிக சிறந்த தண்டனை காத்திருந்தது.

Negative:

* ஆக்ஷன் படம் என்றால் கயிறு கட்டி கதாநாயகன் சண்டைக்கலைஞர்களுடன் சண்டை ோடுவதை jimmy zip ல் படம் பிடிப்பது மட்டும்தான் என்று யாரோ மிக தவறாக விக்ரமனுக்கு சொல்லியிருக்கிறார்கள். சகிக்கவில்லை.
* கதையே இல்லை. மோசமான திரைக்கதை. சற்றும் லாஜிக்கே இல்லாத காட்சிகள்
* ஆரம்பத்திலிருந்து இறுதி வரை எல்லா காட்சிகளையுமே யூகிக்க முடிவதாய் அமைத்திருப்பது.

Positive

(அப்படியெல்லம் ஒன்றுமே இல்லை. இருந்தாலும் ஆறுதலுக்காகவாவது....)
* ரோபோ சங்கர் என்ற (விஜய் டிவி - கலக்க போவது யாரு - வெற்றியாளர்) மிமிக்ரி ஆர்ட்டிஸ்ட் மட்டுமே ஒரே ஒரு
சிறிய ஆறுதல்.
* சில பாடல்களில் இசையமைப்பாளர் - ஜோஷ்வா ஸ்ரீதர்.

இது கலைப்படமும் அல்ல, கொலைப்படமும் அல்ல, மசாலா படமும் அல்ல. இந்த விதம் என்று வகைப்படுத்த இயலாமலேயே போவதை வேண்டுமானால் சிறப்பம்சமாக சொல்லலாம்.

சென்ற வருடம் இதே போலவே பாசிலையும், இளையாராஜா பாடல்களையும் நம்பி "ஒரு நாள் ஒரு கனவு" திரைப்படத்திற்கு போன ஞாபகம் ஏனோ வந்தது. ஒரு நல்ல மாலைப்பொழுது வீணாய்ப்போனது.

வேட்டையாடு விளையாடு

2006-09-05T12:32:00.000+04:00

நான் மிகவும் ரசித்தவைகள்

1.முதல் பாதி வேகம் - (அந்த முதல் சண்டைக்காட்சியினை தவிர) மிக லாவகமாக கையாளப்பட்ட காட்சிகள், சுவாரசியம் குறையாத கதையின் போக்கு.

2. கமாலினி - பாடலும் வசனங்களும் அந்த 10 நிமிட பிளாஷ்பேக்கும். - அழகிய கவிதை.

3. ஜோதிகாவின் கதாபாத்திரத்தை மிக சீரியசாக அறிமுகப்படுத்த அவரது மேசையில் "ஒரு மாலையும், இன்னொரு மாலையும்" புத்தகம், "house of sand and fog" பற்றிய பேச்சு, "நான் இப்போல்லாம் ரொம்ப அழுமூஞ்சி ஆகிட்டேன்" என்ற மிகச் சிறிய வசனம்.

4.R.D.ராஜசேகர் கேமரா இல்லையே என்ற லேசான ஏக்கம் எனக்கு படும் தொடங்கி சற்று நேரம் வரை இருக்கத்தான் செய்தது. (காக்க காக்க, கஜினி இரண்டிலுமே என் முதல் ஒட்டு RDR க்குதான்) . ஆனால் ரவிவர்மனின் ராஜாங்கத்தை பெரிய திரையில் பார்த்து பிரமித்து இரண்டாம் முறை காமிரா நுணுக்கங்களை காணவே செல்லவிருக்கிறேன்.

5.எங்கும் சுவாரசியம் குறையாத படத்தொகுப்பு - (ஆண்டனி) .

6. தாமரை - மிக அழகான உரைநடை கவிதைகளை பாடல்களில் புகுத்தியிருப்பதால். ("என் பதாகை தாங்கிய உன் முகம் என்றும் மறையாதே")

குறைபாடுகளாய் எனக்கு பட்டவை

1. என்னதான் 35+ வயதுள்ள போலீஸ் தொப்பையுடன் இருப்பார் என்ற "அடிப்படை" உண்மை உணர்ந்திருந்தாலும் கமலை அவ்வாறு பார்க்க மனது வரவேயில்லை. சண்டைக்காட்சிகளில் அவர் திணறுகிறாரா? இல்லை அவ்வாறாக அவை அமைக்கப்பட்டுள்ளனவா? என்று தெரியவில்லை. மேலும் "மாட்டுவடா", "யார்கிட்ட..?" என்பது போன்ற விஜய்-அஜித் ரக வசனங்கள் அவ்வளவாக சிறக்கவில்லை.

2. பாதிபடம் போன பிறகு இடைவேளைக்கு சற்று முன்பே அறிமுகமாகும் வில்லன்களின் அறிமுகம் கதையின் வேகத்தை திடீரென்று குறைக்கதான் செய்கிறது. மாறாக அந்த கதாபாத்திரங்களின் details சற்று விபரமாக விசாரணை காட்சிகளில் காட்டப்பட்டிருக்க வேண்டும் என்று நினைக்க தோன்றுகிறது.

3. பாடல்கள் மிக அழ்காக compose செய்யப்பட்டிருந்தாலும் பின்னணி இசை அளவுக்கு அதிகமான இரைச்சலுடன் இருக்கிறது சில காட்சிகளில். (கஜினியிலும் இந்த குறை இருந்தது)

4. மிக வேகமாக காட்சிகள் சென்றிருக்க வேண்டிய இரண்டாவது பாதியில் பாடல்களின் இணைப்பு பெரும் பிசகாகிவிட்டது. இனிமையான "உயிரிலே.." பாடல் சுத்தமாக ரசிக்கமுடியாத situation ல் வருவதால் எரிச்சலே மிஞ்சுகிறது.

ஆயினும் ஒரு நல்ல crime thriller நெடுநாட்களுக்கு நல்ல முறையில் வந்திருப்பது எனக்கு மிக மகிழ்வே!

ஆனந்த ராகம் - மீண்டும்

2006-08-19T15:30:00.000+04:00

உமா ரமணன் , தீபன் சக்ரவர்த்தி குரலில் இளையராஜா இசையில் "ஆனந்த ராகம், கேட்கும் காலம்.." என்ற மிக இனிய பாடலை யாராலும் மறக்க முடியாத அந்த இனிய கீதத்தை மீண்டும் இளையராஜாவே ஹிந்தி திரைப்படம் ஒன்றிற்காக மறு இசை வடிவப்படுத்தியிருக்கிறார். வடிவம் மாறியிருந்தாலும் மீண்டும் புத்துயிர் பெற்றிருக்கிறது.மிக இனிய ஒரு மெலடி மீண்டும் உருமாற்றம் பெற்று மிக அழகாக இசைக்கப்பெற்றிருக்கிறது.

பாடல் : "சாரா யே ஆலம்.."
திரைப்படம் : "ஷிவா"
பாடியவர்கள் : ஷ்ரேயா கோஷல், ரூப் குமார் ரதோட்
இசை : இளையராஜா

பாடல் சுட்டி : http://www.bollymaza.com/movie_song_shiva.htm

இந்த படத்தின் மற்ற பாடல்களும் 80-90 களில் வெளிவந்த பிற பாடல்களை ஒற்றியே அமைக்கப்பெற்றுள்ளது.

கடல் பார்த்தல் அல்லது கவலை பார்த்தல்

2006-08-10T10:35:00.000+04:00

கவலைகளில் கரைந்து போகும் என்
இரவுகளுக்கு தெரியும்
எத்தனை ஈரமானது
ஒரு துயர் நிறைந்த நாளென்று!

ஒரு நீண்ட பகற்பொழுதின் நீட்சியில்
கடலினில் மூழ்கப்போகும்
கதிரவனோடு என் துயரங்களைப்
பகிர்ந்து கொள்ள செல்வேன்!

அலைகளின் கால்களில்
கட்டிய சலங்கை இன்னொரு
பாதத்தடங்களை மெல்ல
நினைவுறுத்தி செல்லும்!

கூழாங்கற்கள் எல்லாமே
சற்றும் சிவப்பு,களைப்பு படராத
பளபளப்பான கண்களை
இடையுறுத்தி செல்லும்!

குழந்தையை அலையிலிருந்து
மீட்டெடுக்க எத்தனிக்கும்
ஏதோ ஒரு தாயின் கரங்கள்
தவறாமல் நினைவுக்கு
கொண்டு வரும்
வேறொரு தருணத்தில்
பிரியங்களை வாரியிறைத்த
வளைக்கரங்களை

நீலக்கடலின் அலைகளினூடே
கரைந்து போகுமெனெவே
எடுத்து சென்ற
துயரங்கள் யாவும்
இரட்டிப்பாக்கி வீடு
திரும்புவேன்!

இருட்டறையும் வரவேற்கும்
இன்னொரு கறுப்பு இரவில்
என்னை கரைத்துக்கொள்ள.

மாரீசம் யாதோ...?

2006-08-07T12:53:00.000+04:00

பாடல் வரிகள் : வாலி
இசை : A.R.ரஹ்மான்
பாடியவர்கள் : கரோலிசா ,முகமது அஸ்லாம்,கிருஷ்ணா
திரைப்படம் : சில்லென்று ஒரு காதல்

"சில்லென்று ஒரு காதல்" (வரிச்சலுகைக்கென பெயரின் முதல் வரியில் "ஜி", "சி" யானது போலும்!) இசை கேட்டபிறகு எனது செல்லிடப்பாடுவானில் அடிக்கடி ஒலிக்கும் பாடலாய் இருக்கிறது "மாரீசம் யாதோ.." முழுக்க ஆங்கிலம் கலக்காத நல்ல தமிழ் தமிழ் தோய்ந்த மேற்க்கத்திய இசை பாணியில் நெய்யப்பட்ட மிக நல்ல பாடல்.

மாரீசம் யாதோ , இந்த மாதோ
காதல் தீதோ, சூதோ, வாதோ
இணையாதோ, உடையாதோ

இந்த முதல் மூன்று வரிகள் முதல் மூன்று நிமிடங்களுக்கு நிறைய இசைகோர்வைகளுக்கு நடுவில் மூன்று தடவை தொடர்ந்து "கரோலிசா" வால் பாடப்படுகிறது. மிக வேகமாக சென்று கொண்டிருக்கும் நேரத்தில் சட்டென்று விழும் சன்னமான மெளனத்தில், மிக மெல்ல ஒலியில் கெளதம்,கெளதம்... என்று கரோலிசாவின் குரல் வந்து விழ தொடர்கிறது, முகமது அஸ்லாம் குரல்

யார் இது, உன் பூர்வம் எது
என்ன தீ இது
புகை மூடி நின்றது
என் யாக்கை உயிர்
வெளி நின்றதோ!
மின்னல் ஒராயிரம்
உயிர் கொண்டதோ!
தேஜோபயம்

மெல்லிய இசை கடந்து போக, தேஜோபயம், ஜென்மாந்திரம், சாகுந்தலா, ப்ரேமாஸ்திரம், என்ற வார்த்தைகள் ஆண் மற்றும் பெண் குரலில் ஒலிக்க மெல்ல ஓய்ந்து மெல்லிய தாள கதிக்கு வந்து நிறைவடைகிறது பாடல்.

மிக அழகான இந்த பாடலை திரையில் காண பெரும் ஆவலோடு காத்திருக்கிறேன்.

பின்குறிப்பு:

மிக நல்ல இசைவட்டில் மட்டும் கேட்கவும்.

சுட்டிகள்:

http://www.musicindiaonline.com/l/26/s/movie_name.8567/

சம்திங் சம்திங் உனக்கும் எனக்கும்

2006-08-06T14:05:00.000+04:00

மொழி : தமிழ்
நடிப்பு : ரவி,த்ரிஷா,பிரபு,பாக்யராஜ்,கீதா,ரிச்சா,தேஜாஸ்ரீ,சந்தானம்,

மணிவண்ணன்,ஹனீபா,சச்சு,மல்லிகா,கலாபவன் மணி......(இன்னும் நிறைய பேர்)
இசை : தேவிஸ்ரீ பிரசாத்
இயக்கம் : M.ராஜா

ஜெயம்,M.குமரன் s/o மஹாலக்ஷ்மி திரைப்படங்களுக்கு பிறகு இயக்குனர் ராஜாவின் மூன்றாவது திரைப்படம்.தெலுகுவில் மாபெரும் வெற்றி பெற்ற திரைப்படத்தின் (Nuvvostanante Nenoddantana) மாற்று மொழி வடிவம். முதல் வாரமே தியேட்டரில் சென்று பார்க்கும் திரைப்படங்களுக்கென சில இலக்கணங்கள் வைத்திருக்கிறேன். அவற்றின் எந்த எல்லைக்குள்ளும் இந்த திரைப்படம் வரவில்லை எனினும் பெரிதும் ஏமாற்றவில்லை என்பது எனக்கு நல்ல செய்தியே.

கதை

பாசமான தங்கை பணக்கார NRI வாலிபனை காதலிக்க, பெற்றோர் எதிர்ப்பை மீறி காதலன், காதலியின் அண்ணனின் condition களை நிவர்த்தி செய்து காதலியை கைபிடிக்கும் கதை. கதை கொஞ்சம் பழசானாலும் condition மட்டும் புதுசு. UK return ரவி வயற்காட்டில் விவசாயம் செய்து அண்ணனைவிட அதிக கொள்முதல் செய்ய வேண்டும் என்பதுதான்.

கதாபாத்திரங்கள்

நாயகன் ரவி. நன்றாக நடித்திருக்கிறார் என்று சொல்ல ஆசையாகதான் இருக்கிறது.(அவருக்கு இனிமேல் make-up போடாமல் இருந்தால் நன்றாக இருக்குமோ? சில இடங்களில் அளவுக்கு அதிகமாக முகத்தில் பவுடர் பூச்சு தெரிகிறது.) ஆனால் நாயகி திரிஷாவை விட நன்றாகவே நடித்திருக்கிறார்.

சந்திரமுகிக்கு பிறகு பிரபுவிற்கு மீண்டும் குணசித்திர வேடம். அண்ணன் கதாபாத்திரத்தில் திறம்பட செய்திருக்கிறார். நிறைய இடங்களில் சிவாஜியின் மேனரிசம் தெரிகிறது.
ரவியின் பெற்றோராக வரும் கீதா-பாக்யராஜின் கதாபாத்திரங்கள் செய்வதற்கு நிறைய இருந்தபோதும் அவர்களை அளவோடு நிறுத்திவிட்டது ஏன் என்று தெரியவில்லை. அதுவும் கீதாவை இடைவேளைக்கு பிறகு காணவே காணோம்.

இவர்கள் தவிர மற்ற கதாபாத்திரங்கள் அனைத்திற்கும் அவ்வப்போது ஒரு 15 நொடி புகழ் கொடுத்து அவர்களை திரையின் ஒரமாய் சமர்த்தாய் நிறுத்தி வைத்திருக்கிறார் இயக்குனர்.
(கலாபவன் மணி போன்ற ஒரு நல்ல நடிகருக்கு அடியாள் வேடம் கொடுத்து அவரது திறமைக்கு அணை போட்டிருப்பது சற்றே வருத்தம் தரதக்க செய்திகளில் ஒன்று)

காட்சி ஓட்டம்

முதற்பாதி முழுவதுமே ஜனரஞ்சகமாக சில நல்ல "தரமான நகைச்சுவை" ( காட்சிகளோடுதான் நகர்கிறது. இரண்டாவது பாதிதான் சற்றே அதிகமான தெலுகு வாடையுடன் + 80-90 களில் வெளியான தாலி + அரிவாள் + சென்டிமென்ட் காட்சிகளை ஒட்டி அமைக்கப்பட்டுள்ளது.

படம் முழுதும் தொய்வில்லாமல் முழு உத்வேகத்துடன் இழைக்கப்பட்டுள்ளது தேவிஸ்ரீபிரசாதின் இசை. நல்ல தாளகதியில் அமைந்த பாடல்கள் , குறையில்லாத பின்னணி இசை என தனது ராஜாங்கத்தை நடத்தியிருக்கிறார். (கபிலனின் வரிகளில் "உன் பார்வையில்" பாடல் என்னுடைய ஆதர்சம்.)

Special Effects காட்சிகளை தேவைப்பட்ட இடங்களில் புகுத்த முயற்சி செய்திருக்கிறார். பெரும்பாலான இடங்களில் நன்றாக வந்திருக்கிறது.

லண்டன் என்று சொல்லி துபாயை காட்டுவது எல்லாம் அவர்களுக்கே நியாயமாக இருந்தால் சரி

சிறப்பம்சங்கள்

1. இசை
2. பிரபு
3. முதற்பாதி

குறைபாடுகள்

1. பின்பாதி
2. உபயோகப்படுத்தப்படாத ஏகப்பட்ட கதாபாத்திரங்கள்

சுட்டிகள்

திரைப்பட இணையதளம்

நல்ல பொழுதுபோக்கு படம் மட்டுமே!

CRASH

2006-08-02T16:28:00.000+04:00

மொழி : ஆங்கிலம்
வெளியான வருடம் : 2005
நடிகர்கள் : brenden fracer, sandra bullock,thandie newton,matt dillon,Don chedle மற்றும் பலர்.
இயக்கம் : Paul Haggis

CRASH என்ற பெயரைக் கேட்டதும் ஏதோ பெரிய விபத்தினை ஒட்டிய கதை என்றுதான் நினைக்க தோன்றியது. இந்த திரைப்படத்திலும் விபத்துகள் உண்டு. ஆரம்பத்திலும், இறுதியிலும் இரண்டு சிறிய விபத்துகள் படத்தினூடே ஒரு பெரிய விபத்து என காட்சிகள் இருந்தாலும் அவை எல்லாம் படத்தின் கதைக்கு உதவும் சம்பவங்களேயன்றி படத்தின் கருவை விளக்கும் அம்சங்களாக கையாளப்படவில்லை.

ஆரவாரமில்லாத, சற்றே சிக்கலான, நிறைய கதாபாத்திரங்களைக் கொண்ட ஆனால் மிக அழுத்தமான திரைக்கதையின் வாயிலாக படைத்திருக்கிறார் இயக்குனர் பீட்டர் ஹாகிஸ்.
முன், பின் தெரியாத 12 கதாபாத்திரங்கள். அவர்களின் தீவிர அடிப்படை சித்தாந்தங்கள், ஆசைகள்,கோபம், வெறுப்பு, சந்தோஷம் என 36 மணி நேரங்கள் அவர்களின் வாழ்வில் எவ்வளவு குழப்பங்கள் நிகழ்ந்து தெளிகின்றன என்பதை விளக்கும் திரைக்கதை.

திரையில் தோன்றும் கதாபாத்திரங்கள்:

-இரண்டு காவல்துறை துப்பறியும் அதிகாரிகள் cum காதலர்கள் - கிரஹாம் மற்றும் ரியா
-ஒரு மாவட்ட அட்டர்னியும் (DA) அவரது மனைவியும் - ரிக் மற்றும் ஜீன்
-இரண்டு கறுப்பின திருடர்கள் - பீட்டர் மற்றும் ஆன்டனி
-இரண்டு காவலாளிகள் - ரேயான் மற்றும் தாமஸ்
-ஒரு தொலைக்காட்சி நிறுவன இயக்குனரும் அவரது மனைவியும் - (ஆப்பிரிக்க-அமெரிக்க தம்பதி) - கேமரூன் மற்றும் கிரிஸ்டினி
-ஒரு பூட்டு சரிசெய்யும் கொரிய பிரதிநிதி மற்றும் அவரது குடும்பம்- டேனியல்
-ஒரு பெர்சிய கடை உரிமையாளர் அவரது குடும்பம் - பர்ஹத்

இவ்வளவு கதாபாத்திரங்களை வைத்துக்கொண்டு என்ன செய்யப்போகிறார் என்று புரியவே 20 நிமிடங்களுக்கு மேல் ஆகிவிட்டது. இவர்கள் அனைவருக்கும் தனி தனியாக கவலைகள், பயங்கள்,இலக்குகள் என அவரவரவர்க்கு இருக்கும் தனிப்பட்ட நிகழ்வுகள் போக இவர்கள் வெவ்வேறு சம்பவங்களின் வாயிலாக சந்திக்கும்போது நிகழும் குழப்பங்களும் தீர்வுகளும்தான் கதை.

ஒரு ஆரம்பம் , ஒரு முடிவு என்ற வழக்கமான அணுகுமுறையிலிருந்து விலகி அவர்களது தினசரி நடவடிக்கைகளைக் கொண்டேகாட்சிகள் விரிந்து செல்கின்றன.ஒவ்வொருவரின் குணாதிசயங்களும், செயல்பாடுகளும் சூழ்நிலை காரணங்களால் மாறுபடுவதை மிக மிக அருமையாக தேர்ந்த காட்சிகளின் வாயிலாக வெளிப்படுத்துகிறது திரைப்படம்.

கதை அல்லது சம்பவங்களின் கோர்வை:

>
கதை என்று சொல்லப்போனால் அது மிகவும் குழப்பமாகவே முடியும். ஏனெனில் வழக்கதுக்கு மாறாக இதனை நிறைய சம்பவங்களின் கோர்வையாகவே கொடுத்திருக்கிறார் இயக்குனர்.

* கிரஹாம் ஒரு துப்பறியும் அதிகாரி. குற்றவாளியாக திரியும் தனது இளைய சகோதரனால் போதைக்கு அடிமையாகிவிட்ட தனது அம்மாவை தேற்ற முடியாமல் தவிக்கும் ஒரு கதாபாத்திரம். தான் எவ்வளவுதான் அக்கறை எடுத்துக்கொண்டாலும் தனது இளைய மக்னையே எண்ணிக்கொண்டிருக்கும் அவரது தாயை எண்ணி பெரிதும் வருந்துகிறார். கிரஹாமின் உடனுறை அதிகாரி மற்றும் காதலியாய் ரியா.

* பீட்டர் மற்றும் ஆன்டனி என்கிற இரண்டு கறுப்பின திருடர்கள். கருப்பர்கள் அனைவரும் கொள்ளைக்காரர்கள் போல வெள்ளையர்களால் நடத்தப்படுகிறார்கள் என்று குறைப்பட்டுக்கொண்டு தினமும் கார் திருடும் நவீன கொள்ளைக்காரர்கள். அறிமுகக் காட்சியில் அந்த மாவட்ட அட்டர்னியும் (DA) அவரது மனைவியும் செல்லும் காரை கொள்ளையடிக்கின்றனர்.

* பீட்டரின் திருட்டு வாதங்களை விரும்பாமலும் வெறுக்காமலும், அவனின் நட்பை உதறமுடியாமலும் அவனுடன் இணைந்து செயல்படுகிறான் ஆன்டனி. ஒரு முறை கார் திருடி செல்லும்போது போலிஸின் துரத்தலில் இருவரும் தனி தனியே செல்ல நேர்கிறது. சென்ற இடத்தில் பீட்டர் ஞானோதயம் பெறுகிறான். ஆன்டனி கொல்லப்படுகிறான்.

* கார் திருடு போன அதே நாளில் அவர்களது வீட்டின் பாதுகாப்பிற்கென கதவுகளின் சாவிகளை மாற்ற சொல்லி மாவட்ட அட்டர்னியான தனது கணவனுடன் சண்டை போடுகிறாள் ஜீன். அந்த வீட்டிற்கு பூட்டு பழுது பார்ப்பவனாக வருகிறான் டேனியல் என்னும் கொரிய நாட்டவன். ஜீன் பேச்சில் தென்படும் கருப்பர்களுக்கு எதிரான வாதங்களை சகித்துக்கொண்டு தனது வேலையை முடித்து விட்டு செல்கிறான்.

* பிறிதொரு நேரத்தில் ஒரு பெர்சிய கடையின் பூட்டுக்களை சரி செய்வது தொடர்பாக அந்த கடை முதலாளி பர்ஹத் உடன் சண்டை போட்டு திரும்புகிறான். அடுத்த நாளில் பர்ஹத்தின் கடை கொள்ளை போகிறது. அதற்கு காரணம் டேனியலே என்று எண்ணி அவனை கொல்வதற்காக துப்பாக்கியுடன் அவனது வீட்டிற்கு செல்கிறான். அங்கே அவனே அறியா வண்ணம் அவனது துப்பாக்கியின் குண்டு டேனியல் மகளின் மீது பாய அதிர்ச்சியில் உறைந்து போகிறான். அதிர்ஷ்டவசமாக அந்த பெண் பிழைத்துவிட நிம்மதி பெருமூச்சு விடுகிறான்.

* மாவட்ட அட்டர்னியின் மனைவியாக வரும் ஜீனுக்கும் கறுப்பர்கள்பால் லேசான வெறுப்பு தொனிக்க தனது நடவடிக்கைகளை வைத்திருக்கிறாள். தனது வீட்டு உதவியாளராக இருக்கும் பெண்ணீனை அவர் கறுப்பினம் சார்ந்தவர் என்ப்தாலேயே அவர் பால் வெறுப்பை உமிழ்கிறாள். ஆனால் கணவரின் பால் கொண்ட கறுத்து வேறுபாடுகள் முற்றிப்போன ஒரு நாளில் மாடிப்படியில் தவறி விழ நேரில துணையின்றி தவித்த நேரத்தில் வீட்டு உதவியாளினி கைகொடுக்க தனது கறுப்பின வேறுபாடுகளை மறக்கிறாள்.

* கேமரூன் மற்றும் கிரிஸ்டினி ஆகிய் இருவரும் ஒரு மகிழ்வான மாலை வேளையில் காரில் போய்க்கொண்டிருக்கும்போது ரேயான் மற்றும் தாமஸ் ஆகிய இரு காவல்துறை அதிகாரிகளலால் தடுத்து நிறுத்தப்படுகிறார்கள். தனது தந்தைக்கு மருத்துவ உதவிகளை திறம்பட வழங்கவில்லை என்ற கோபத்தில் ஒரு மருத்துவமனையின் கறுப்பின சிப்பந்தியை தொலைபேசியில் கடிந்து கொண்டு வருகிறான் ரேயான். அவனுடைய சொந்த வெறுப்பு இந்த கறுப்பின தம்பதிகளின் மீதும் பாய தேவையின்றி அவர்களை காரிலிருந்து இறக்கி கிரிஸ்டினியின்பால் சோதனை என்னும் பெயரில் தவறான உடற்சார் அத்துமீறலை மேற்கொள்கிறான். அவனை எதிர்க்க திராணியின்றி கேமரூன் புழுங்குகிறான். இந்த செய்கையை சற்றும் விரும்பாத தாமஸ் தனது ஒத்துழையாமையை வெளிப்படுத்துகிறான்.

இந்த சம்பவத்திற்கு பிறகு கேமரூன்-கிரிஸ்டினி இடையே இடைவெளி அரும்புகிறது. வீட்டிற்கு போக விருப்பமின்றி கண்போன போக்கில் வாகனத்தை செலுத்துகிறான். பிறகு வழியில் போலீஸிடமிருந்து தப்பித்து வரும் பீட்டருக்கு புகலிடம் கொடுத்து அவனை தப்பிக்க வைக்கிறான். போகிற போக்கில் யாரோ சில கறுப்பர்கள் செய்யும் தவறுக்கு மற்றவர்கள் படும் அவதியினைப்பற்றி பேச பீட்டர் மனம் மாறுகிறான்.

* மற்றொரு காவல் துறை அதிகாரியான தாமஸ் ரேயானிடமிருந்து தனது பொறுப்பை விடுவித்துக்கொண்டு தனியே சென்றுவிடுகிறான். வழியில் பீட்டரை பிரிந்து தனியே வரும் ஆன்டனிக்கு தனது காரில் lift கொடுக்கிறான். சற்று நேரம் பேசிக்கொண்டிருக்கும்போதெ அவ்னது செய்கைகளில் சந்தேகம் கொண்டு அவ்னை கொன்றுவிடுகிறான். இறந்த பிறகே அவன் குற்றமற்றவன் என்பதை அறிகிறான். மனசாட்சி உறுத்த ஆன் டனியை சாலை ஓரத்திலேயே கிடத்தி விட்டு கடந்து போகிறான்.

* அதே நேரத்தில் மற்றொரு சாலை விபத்தில் சிக்கி உயிருக்கு போராடிக்கொண்டிருக்கும் வேளையில் கிரிஸ்டினியை தனது உயிரினையும் பொருட்படுத்தாது காப்பாற்றுகிறான் ரேயான்.

சிறப்பம்சங்கள்:

* இத்தனை கதாபாத்திரங்கள் இருந்தாலும் தொய்வடையாத திரைக்கதை, நேர்த்தியான காட்சி அமைப்பு, கதாபாத்திரங்களை இணைக்கும் லாவகம்

* சிறப்பான ஒளிப்பதிவு. லேசான பச்சையை (corporate color போலும்!) திரைப்படம் முழுமைக்கும் தூவிவைத்திருக்கின் றனர்.

எதிர்மறை(யாய் நான் கருதுவது)

* சாதாரண சினிமாவாய் இல்லாது ஒரு intellectual லாய் தோற்றம் கொண்டிருப்பது

விருதுகள்:

2005 - ஆஸ்கர்.

சிறந்த திரைப்படம் (பால் ஹேகிஸ் & பாபி)
சிறந்த திரைக்கதை (பால் ஹேகிஸ் & கேதி ஷூமேன்)
சிறந்த எடிட்டிங் (ஹியூக்ஸ் வின்போன்)

சுட்டிகள்:

DVD சுட்டி

ஆஸ்கர் விருது பட்டியல்

அழகாய் இருக்கிறாய் பயமாய் இருக்கிறது

2006-07-31T16:31:00.000+04:00

மொழி : தமிழ்
நடிகர்கள் : பரத்,மல்லிகா கபூர், அருண்குமார்,தீபு,பாஸ்கர்,ரேணுகா.
இசை : யுவன் ஷங்கர் ராஜா
இயக்கம் : விஜய் மில்டன்
Special Effects : EFX , Media Artists

"கொலுசுகள் பேசக்கூடும்" என்ற மிக பிரசித்தி பெற்ற (உரைநடை) கவிதை புத்தகத்தின் ஆசிரியர் என்ற முறையில் இந்த திரைப்படத்தின் இயக்குனர் "விஜய் மில்டன்" -ன் விசிறி நான். அவரது முதல் திரைப்படம் காண வெகு நாள் காத்திருக்க வேண்டியதாயிற்று.

கதை

தன்னை காதலிக்காத காதலியை அவள் காதலிக்கும் காதலனுடன் சேர்த்து வைக்கும் அந்த கால ஹீரோ கதை என்று ஒற்றை வாக்கியத்தில் சொல்லி விட முடியாதபடி மிக நேர்த்தியான காட்சிகளையும், சம்பவங்களையும் கோர்த்து கத்தி ரத்த சத்த பயமில்லாமல் அழகான திரைப்படமாக செதுக்கியிருக்கிறார்.

தன் காதலியை தேடி சென்னை வரும் மனோ (பரத்) விற்கு தோழியாகிறாள் ஜோ (மல்லிகா). ஜோவின் காதலனான "ப்ரேம்" (அருண்) தான் மனோவின் காதலி "நந்தினி"(தீபு)யின் மனம் கவர்ந்தவன் என்று அறிந்து இருவரையும் பிரிக்க திட்டமிடுகிறார்கள்.

அவர்களின் திட்டங்கள் எல்லாம் பொய்த்துப்போவது மட்டுமல்லாமல் ப்ரேமுக்கும், நந்தினிக்கும் திருமணம் நிச்சயம் ஆகும் வரை செல்கிறது. மனமுடைந்து போகும் மனோவிற்கும், ஜோவுக்கும் இன்ப அதிர்ச்சியாக, அவர்களே எதிர்பாராத வண்ணம் ப்ரேமும் நந்தினியும் அவர்களின் ego போட்டியில் சண்டையிட்டு பிரிந்துவிடுகிறார்கள். அடுத்த கட்ட நடவடிக்கையாக ஜோவை ப்ரேமுடன் சேர்த்து வைக்கும் முயற்சிகளை துவக்குகிறான் மனோ.

ப்ரேம் அலுவலகத்தில் வேலைக்காக அணுகும்போது, ஜோ, மனோ ஜோடியினால் பெரிதும் பாதிப்புக்குள்ளான பாஸ்கர் மனோவை சந்தேகப்பட, அவரிடம் தனது பழைய நினைவுகளை பகிர்ந்து கொள்கிறான் மனோ.

தான் தேடி வந்த காதலி நந்தினி அல்ல எனவும், ஜோவே மனோவின் காதலி என்றும் சொல்கிறான். பிறகு மனோவின் காதல் என்ன ஆனது என்பது கிளைமாக்ஸ்.

சிறப்பம்சங்கள்

1. மல்லிகா கபூர் - நிச்சயமாக படத்தின் தலைப்புக்கேற்ற ஹீரோயின் என்பது மிகவும் மகிழ்வான செய்தி. தனது பாத்திரத்தை ( glycerine காட்சிகள் ஒன்றிரண்டு தவிர) மிக நிறைவாக செய்திருக்கிறார். அவருக்கு குரல் கொடுத்திருக்கும் சவீதாவுக்கும் அவரது குரலை சிறப்பாக்கிய பெருமை உண்டு.

2. யுவன் - இந்த திரைப்படம் மட்டுமில்லாமல் இந்த வருட துவக்கத்திலிருந்தே பல நல்ல படங்களை கொடுத்து வருகிறார் யுவன். நல்ல பாடல்கள் சில இருக்கின்றன. உருத்தாத பின்னணி இசையும் நிறைவே.

3. Special Effects - படத்தின் இடை இடையே சிறிய சிறிய அனிமேஷன் காட்சிகளை உலவ விட வேண்டும் என்று யோசித்த இயக்குனருக்கு முதலில் ஒரு சபாஷ். ஆனால் அஞ்சல் அலுவலகத்தில் தபால் பிரிப்பதற்கெல்லாம் அனிமேஷன் காட்சிகளை இணைத்திருப்பது
நிச்சயமாய் தவிர்க்கப்பட்டிருக்கலாம்.

தவிர்க்கப்பட்டிருக்க வேண்டியவை

1. அளவுக்கு மீறியதால் படத்திற்கு பலமாக இருந்திருக்க வேண்டிய அனிமேஷம் காட்சிகள் அலுத்துப்போகும் அளவிற்கு இருக்கின்றன.

2. ரேணுகா கதாபாத்திரம் மிகவும் முற்போக்கான கதாபாத்திரம் என்கிற ரீதியில் அமைக்கப்பட்டிருக்கலாம். ஆனால் அவருக்கு அமைக்கப்பட்டிருக்கும் காட்சிகள் sorry, கொஞ்சம் ஓவர்.

3. க்ளைமாக்ஸ்.

சில குறைகள் இருந்தாலும் நிச்சயமாக இந்த வருடத்தின் சிறந்த படங்களில் இதுவும் ஒன்று என்பதில் நிச்சயம் சந்தேகம் இல்லை. பொருளாதார ரீதியில் படம் தோல்வியாக இருந்தாலும் நல்ல படம் என்ற முத்திரை இருப்பதால் கண்டிப்பாக அடுத்த படத்தில்
விஜய் மில்டன் ஜெயிப்பார் என வாழ்த்துவோம்

Memoirs of a geisha

2006-06-24T12:12:00.000+04:00

(Geisha - A Japanese woman trained to entertain men with conversation and singing and dancing

முதலில் geisha என்ற சொல்லை தமிழில் எப்படி மொழிபெயர்ப்பது என்ற பெரும்
குழப்பம் எனக்குள் வந்தது. "ஆடல் மகளிர்" என்றுதான் நான் புரிந்து கொண்டேன்.
ஏனெனில் இவர்கள் விபசாரம் என்ற எல்லைக்குள் வருவதில்லை. ஆகவே
அவர்களை குறிக்கும் வார்த்தையை நான் உபயோகிக்கவில்லை.
வேறு உகந்த வார்த்தைகள் இருப்பின் அறியத் தறுமாறு வேண்டுகிறேன்.)

ஒரு சிண்ட்ரெல்லா கதை போலதான் தோன்றியது DVD யின் மேலட்டை விமர்சனத்தை
படித்தபோது. பொழுது போக்க வேண்டுமே என்ற எண்ணத்தில்தான் இத்திரைப்படத்தினை
பார்க்க முனைந்தேன். ஆனால் முற்றிலும் நிறைவான அனுபவத்தை அளித்தது இத்திரைப்படம்.

இத்திரைப்படத்தின் பெயரையே தலைப்பாக கொண்ட "ஆர்த்தர் கோல்டனின்" நாவலே இதற்கு
மூலம். ஒரு கடற்கரையோர கிராமத்தின் மழைக்கால மாலைப்பொழுதில் ஆரம்பிக்கிறது திரைப்படம். வறுமையில் வாடும் மீனவ குடும்பத்தின் தந்தை தனது மகள்களை நகரத்தில் உள்ள geisha இல்லத்திற்கு விற்கிறார். அவர்களில் இளையவளான "சியோ சேன்" தனது விபரம் புரியாத 9 வயதில் தனது சகோதரியின்றும் பிரிக்கப்பட்டு இனம் புரியாத அனுபவங்களை வாழ்வில் சந்திக்கிறாள்.

அங்கிருந்து தப்பிக்க முயன்று இல்லத்தின் மூத்த பெண்மணியின் வெறுப்பைப் பெறுகிறாள்.
அவளை அடிமை போல உழ்ல வைக்கின்றனர் அந்த geisha இல்லத்தில் அனைவருமே.
வாழ்வே மிகவும் துயரமானது என்ற எண்ணத்தின் உச்சத்தில் இருக்கும் ஒரு நாளில் "சேர்மேன்" என்று அனைவராலும் அழைக்கப்பெறும் அன்பான உள்ளம் கொண்ட மனிதரை சந்திக்கிறாள். "வாழ்வில் துயரம் என்பது தற்காலிகமானது, மகிழ்வு ஒரு நாளில் அனைவரையும் தழுவிக்கொள்ளும். சற்று தொலைவில்நின்று கொண்டிருக்கும் ஒரு geisha வை சுட்டிக்காட்டி அவளும் துன்பங்களால் ஒரு காலத்தில் அவதிப்பட்டிருக்கிறாள் என்றும்
தற்போது அவளின் மகிழ்வான முகத்தை பார்" என்றும் மிக உற்சாகமான வார்த்தைகளை உதிர்த்துவிட்டுப்போகிறார்.

சில நிமிடங்களே ஆயினும் அந்த அனுபவம் அவள் வாழ்வையே புரட்டிப்போடுகிறது.
சேர்மேன் அவளது இரவு உணவுக்கென கொடுத்த உணவை கோவிலில் காணிக்கையாக்கி என்றேனும் ஒரு நாள் தான் ஒரு geisha ஆக வேண்டும் என்றும், தான் மகிழ்வாக இருக்கும் இன்னொரு தருணத்தில் சேர்மேனை சந்திக்க வேண்டும் என்றும் கோரிக்கை வைக்கிறாள். நம்பிக்கையோடு வாழும் அவளுக்கு பலனும் கிடைக்கிறது.

அவள் எவ்வாறு ஒரு சிறந்த geisha வாக mould செய்யப்படுகிறாள், அவள் எத்தகைய கணத்தில் சேர்மேனை சந்திக்க நேரிடிகிறது என்பதையெல்லாம் என்பதனை ஒரு கவிதை போன்று சிறப்பாக ஒளிப்பதிவு செய்யப்பட்ட , சிறந்த இசைக்கோர்வு செய்யப்பட்டகாட்சிகள் மூலமாக மிக அழகாக வெளிப்படுத்தியிருக்கின்றனர்.

மூன்று ஆஸ்கார் விருதுகளை பெற்றிருக்கிறது. Best cinematography,Best costume design,Best Art Direction ஆகிய மூன்று பிரிவுகள்.சிறந்த இசைக்கோர்ப்பிற்கும் விருது அளித்திருக்கலாமோ என்ற எண்ணம் இருக்கிறது. மிக சிறந்த அனுபவத்தை அளித்த திரைப்படம். கட்டாயம் உலக சினிமா ரசிகர்கள் ஒரு முறை பார்க்க வேண்டியதும் கூட.

சுட்டிகள்

ஆஸ்கர் விருது பட்டியல்

imdb சுட்டி

apple trailer

My date with the president's daughter

2006-06-22T12:40:00.000+04:00

மிகுந்த மனசோர்வு தரும் நாட்களில் ஐகாரஸ்பிரகாஷ் போலவே நானும் நகைச்சுவை திரைப்படங்களை பார்ப்பதை வழக்கமாக வைத்திருக்கிறேன். அவ்விதம் நேற்று பார்த்த திரைப்படம் My date with the president's daughter. லாஜிக் பற்றியெல்லாம் யோசிக்காமல் மனம் விட்டு சிரித்தால் 100% மகிழ்ச்சி நிச்சயம்.

"டக்ளஸ்" என்கிற நடுத்தர குடும்பத்தை சேர்ந்த , நண்பர்களால் அடிக்கடி கேலி செய்யப்படுகிற "dating" ற்காக ஒரு நல்ல பெண் தேடிக்கொண்டிருக்கிற வாலிபன். சம்பிரதாய
முதற்குடிமகனுக்கான அனைத்து பாதுகாப்பு கட்டமைப்புகள் தாண்டி வெளியில் வர நினைக்கிற அமெரிக்க அதிபரின் மகள் "ஹேலி". இவர்கள் விபத்தாக ஒரு கணத்தில் சந்தித்து தங்களின் date ஆசையை பூர்த்தி செய்ய முடிவு செய்கின்றனர். வழக்கமான ஆரம்பகட்ட தயக்கங்களுக்கு பிறகு தக்க பாதுகாப்புடன் தனது மகளை அனுப்பி வைக்கிறார் அமெரிக்க அதிபர்.

ஆனால் கூடவே வந்து தொல்லை கொடுக்கும் பாதுகாவலர்களின் பிடியிலிருந்து
தப்பி ஓடி பல்வேறு சிக்கல்களை சந்தித்து எப்படி தங்களது முதல் dating
அனுபவத்தை வெற்றிகரமாக்குகின்றனர் என்பதை மிகவும் நகைச்சுவையாக
90 நிமிட திரைப்படத்தில் கண்டு மகிழலாம்.

"டக்ளஸ்ஸின் தங்கையாக வரும் அந்த சிறுமி அவ்வப்போது உதிர்த்து விட்டுப்போகும்
நகைச்சுவை வசனங்கள், ஹேலியும், டக்ளஸ்ஸும் தப்பியோடும் chasing காட்சிகள்,
சிறிய சிறிய உத்திகளாலேயே ஹேலியைக் டக்ளஸ் கவரும் இடங்கள் என
நிறைய நகைச்சுவை அம்சங்களைக் கொண்ட திரைப்படமாக இருந்தது.

வாய்ப்பு கிடைத்தால் நிச்சயம் பாருங்கள்.

imdb link

amazon link

ஓடு!

2006-06-21T12:50:00.000+04:00

அது ஒரு ஆப்பிரிக்க காடு
தினமும் காலையில்
அங்கு ஒரு மான் கண் விழிக்கிறது
அது அந்த காட்டிலேயே மிக
வேகமாக ஓடும் சிங்கத்தை விட மிக
வேகமாக ஓட வேண்டும்

இல்லையெனில் அந்த நாளின் முடிவு
சாவுதான் என்பதை அந்த மான்
உணர்ந்திருந்தது.

அதே காட்டில் தினமும்
ஒரு சிங்கமும் கண் விழிக்கிறது
அது தன்னை விட வேகமாக
ஓட முயற்சிக்கும் மானின்
வேகத்திற்கு ஈடு கொடுக்கும் வண்ணம்
ஓட வேண்டும்

இல்லையெனில் அந்த நாளின் முடிவு
பட்டினிதான் என்பதை அந்த
சிங்கமும் உணர்ந்திருந்தது

நீங்கள் மானாக இருக்கிறீர்களா?
அல்லது சிங்கமாக இருக்கிறீர்களா
என்பது முக்கியமில்லை

ஆனால் காலையில் எழுந்தவுடன்
ஓடத்துவங்க வேண்டும்
அதுதான் முக்கியம்

- சமீபத்தில் படித்து மிகவும் ரசித்தது....

சுயங்களின் வலி

2006-06-21T12:00:00.000+04:00

வெளிச் சொல்லமுடியாத
வெக்கைகளின் வெளிகளில்
பற்றியெறிகின்றன
என் பச்சை தாவரங்கள்

சுயங்களின் முனை முறிவுகளில்
தடவப்பட்ட பிரியக்களிம்புகள்
என்றென்றும் ஆற்றுவதில்லை
புரையோடிப்போன மனக்காயங்களை

இருள் நிறைந்த பாதைபோல
ஒளியற்றுப்போகிறது வாழ்க்கை
சில நேரங்களில்
ஆங்கே ஒட்ட வைத்த
மெழுகு போல
உன் பிரியங்கள் அவ்வப்போது
என்னை ஆற்றுமாயினும்
வழியற்றுத் திரிகின்றன
என் விழிப் பட்டாம்பூச்சிகள்

காலங்களின் வழிதெரியா
ஒற்றையடிப்பாதையின்
வழியே
வழிந்தோடிக்கொண்டிருக்கிறது
என் பிரியங்களின் ஆழ்நதி

என்றேனும் ஒருநாள்
கரையேருமென்ற
நம்பிக்கையில்
நானும் என் பிரியங்களும்
உன் பின்னாலேயெ
நடைபயில்கிறோம்.

வெறுமை ஈனும் இரவுகள்

2006-06-19T18:05:00.000+04:00

எப்போதும் எதிர்படுவதேயில்லை
இனிமைகளை உள்ளங்கையில்
வைத்து தாங்கும்
ஏக்கங்களற்ற இரவுப்பொழுதுகள்

பெரும் கூட்டமாய் நட்சத்திரங்களுக்கீடாய்
காய்த்திருக்கின்றன
கவலைகளை ஈனும்
வெறுமைச் செடிகள்
என்னுள்ளே

தூக்கத்தினை இடவலமாய் பந்தாடும்
அரும்பெரும் கலையினை
கைவரக் கற்று வந்திருக்கின்றன
எனக்கான இரவுகள்
அவை ஒருபோதும்
என்னை ஒருமித்த
மனநிலையில்
வைத்திருப்பதில்லை

ஒட்டுமொத்த இரவும்
ஒருமித்த அமைதியில்
நிலைத்திருக்க
மோனத்தின் மறுபக்கத்தினை
நுகர்ந்தவாறு விழித்திருக்கிறே

என்றாகிலும் ஒருநாள்
தூக்கம் கொடுக்கும்தேவதைகள்
என்கதவு தட்டும் ஒசையில்
வெடித்துப்பறக்கும் என்
வேதனையின்சிறகுகளை
எண்ணியவாறே!

யாரேனும் சொல்வீராஅதன்
முகவரிகள் என்றகேள்வியில்
கரைகின்றன மீத இரவுகளும்.

Banlieue 13 -French ( B13 District)

2006-06-19T16:21:00.000+04:00

மிகச் சிறிய கதைக்களன், குறைந்த ஆனால் வலுவான கதாபாத்திரங்கள் மிக வேகமான கேமரா இயக்கங்களென நிறைய ஆச்சர்யங்களை உள்ளடக்கி காத்திருந்தது இந்த French திரைப்படம். அதிவேகமான பயணம் போல நகர்கிறது திரை. 80 நிமிடத்தில் மிக அருமையான ஒரு ஆக்ஷன் திரில்லர்.

டேமியன் என்ற காவல் துறை இளைஞனும், லெய்டோ என்ற சிறைக்கைதியும் இணைத்து சொல்லப்படுகிறது கதை. இரண்டு இளைஞர்களின் தனித் திறமைகளை அறிமுகக்காட்சிகளில் மிக அநாயசமான துரத்தல் மற்றும் சண்டைக்காட்சிகளில் படம் பிடித்துக்காட்டுவது அழகு.
அதே நேரத்தில், ஒரு மிகப்பெரிய அளவில் மக்களிடையே சேதம் விளைவிக்ககூடிய நைட்ரஜென் அணுகுண்டு ஒன்றினை கண்டுபிடித்து செயல் இழக்க வைக்கும் மிகப்பெரிய பொறுப்பு டேமியனை தேடி வருகிறது. அந்த நைட்ரஜென் குண்டில் பொருத்தப்பட்ட லொகேடரின் வாயிலாக அது B13 மாவட்டத்தின் உள்ள தாகா என்ற சிறுகும்பல் தலைவனின் பிடியில் இருப்பதாக கண்டுபிடிக்கப்படுகிறது.

B13 மாவட்டத்தில் பிறந்து அந்த நகரின் வரைபடத்தினை, ஒவ்வொரு மூலை முடுக்குகளை அறிந்தவன் என்ற முறையில் லெய்டோவினை டேமியன் துணையாக அனுப்பவும் காவல் துறை முடிவெடுக்கிறது.சிறிய குற்றங்களுக்காக சிறையில் இருக்கும் லெய்டோவின் லட்சியம் தன் தங்கையை கடத்தி வைத்திருக்கும் தாகாவிடமிருந்து மீட்பதே.

இவ்விதமாக இரன்டு கதாபாத்திரங்களுக்கிடயே அறிமுகம் ஏற்படலும், அதை தொடர்ந்து உருவாகும் சிக்கல்களின் கோர்வையும்,சிறந்த சேசிங் காட்சிகளும் பிறகு வழக்கம்பொல எல்லாம் நன்மையில் முடிவுற சுபமும்.

திரைப்படத்தின் மிக சிறந்த பகுதியாக சேசிங் காட்சிகளையும், கேமரா நுட்பங்களையுமே குறிப்பிட வேண்டும். அதிவேகமாக நகரும் திரைக்கதையும் படத்திற்கு பெரிய பலம்.
ஆக்ஷன் பிரியர்களுக்கு நல்லதொரு திரை விருந்து.

திரைப்படம் பற்றிய விபரங்கள்:

Banlieue 13 ( B13 District)

இயக்குனர் : பியர் மோரல்

ஒரு இல்லமும் சில இன்னல்களும்

2006-06-15T13:45:00.000+04:00

எப்போதும் மிதந்து சென்று கொண்டே இருக்கின்றன
எனக்காக நகரின் ஏதோ ஒரு மூலையில்
ஒளிந்து கொண்டிருக்கின்ற அறையின் சுவடுகள் யாவும்

ஒவ்வொரு தேடலும், தோல்வியும்
உரைத்துக்கொண்டே இருக்கின்றன
புதிய மனிதர்களையும் தோற்றங்களையும்

ஒரு போதும் வாய்ப்பதேயில்லை
மனதிற்க்கியந்த வாடகை இல்லம்
ஒருபோதும்

ஒரு நோய்கொண்ட நாளின்
படுக்கைஅறை போல
பெரும் சலிப்பை அளிக்கின்றன
தேடுதல்களின் நீட்சி.

தேடலின் வலிமைகள் குறைந்து போன
ஒரு தேய்பிறை நாளில் வருகின்றன
அகன்ற அறைகளும் மரங்களடர்ந்த சூழலும்
நீரலைகளை காற்றில்
தடவித் தரும் கிணற்றடியும்
கொண்டசொந்த வீட்டின்
நினைவுகள்

கரைந்து போன மழை நாளின்
சுவடுகள் போல
வீடு குறித்த பழைய நினைவுகள்
கடந்து போக
மீண்டும் தொடர்கின்றன
தேடுதல் குறித்த கவலைகள்.

முதற்புள்ளி

2006-06-15T12:42:00.000+04:00

வணக்கம்

தமிழ் இணையத்தில் வலைப்பூக்களில் இணைவதில் மகிழ்கிறேன். திறம்பட எழுதும் திறன் வாய்ந்தவன் இல்லை எனினும் பெரும் தமிழ் அன்பர்களின் இணைவு என்னை இசைபட வழி நடத்தும் என்ற எண்ணத்தில் உங்களில் ஒருவனாய் இணைகிறேன். வாழ்த்துங்கள் வளர்கிறேன்.

நன்றி